ترجمہ قرآن » سورة نوح - نوح
سورة نوح [0]
ہم نے نوحؑ کو اس کی قوم کی طرف بھیجا (اس ہدایت کے ساتھ) کہ اپنی قوم کے لوگوں کو خبردار کر دے قبل اس کے کہ ان پر ایک دردناک عذاب آئے سورة نوح [1]
ا س نے کہا ’’اے میری قوم کے لوگو، میں تمہارے لیے ایک صاف صاف خبردار کردینے والا (پیغمبر) ہوں سورة نوح [2]
(تم کو آگاہ کرتا ہوں) کہ اللہ کی بندگی کرو اور اس سے ڈرو اور میری اطاعت کرو سورة نوح [3]
اللہ تمہارے گناہوں سے درگزر فرمائے گا اور تمہیں ایک وقت مقرر تک باقی رکھے گا حقیقت یہ ہے کہ اللہ کا مقرر کیا ہوا وقت جب آ جاتا ہے تو پھر ٹالا نہیں جاتا کاش تمہیں اِس کا علم ہو‘‘ سورة نوح [4]
اُس نے عرض کیا ’’اے میرے رب، میں نے اپنی قوم کے لوگوں کو شب و روز پکارا سورة نوح [5]
مگر میری پکار نے اُن کے فرار ہی میں اضافہ کیا سورة نوح [6]
اور جب بھی میں نے اُن کو بلایا تاکہ تو اُنہیں معاف کر دے، انہوں نے کانوں میں انگلیاں ٹھونس لیں اور اپنے کپڑوں سے منہ ڈھانک لیے اور اپنی روش پر اڑ گئے اور بڑا تکبر کیا سورة نوح [7]
پھر میں نے ان کو ہانکے پکارے دعوت دی سورة نوح [8]
پھر میں نے علانیہ بھی ان کو تبلیغ کی اور چپکے چپکے بھی سمجھایا سورة نوح [9]
میں نے کہا اپنے رب سے معافی مانگو، بے شک وہ بڑا معاف کرنے والا ہے سورة نوح [10]
وہ تم پر آسمان سے خوب بارشیں برسائے گا سورة نوح [11]
تمہیں مال اور اولاد سے نوازے گا، تمہارے لیے باغ پیدا کرے گا اور تمہارے لیے نہریں جاری کر دے گا سورة نوح [12]
تمہیں کیا ہو گیا ہے کہ اللہ کے لیے تم کسی وقار کی توقع نہیں رکھتے؟ سورة نوح [13]
حالانکہ اُس نے طرح طرح سے تمہیں بنایا ہے سورة نوح [14]
کیا دیکھتے نہیں ہو کہ اللہ نے کس طرح سات آسمان تہ بر تہ بنائے سورة نوح [15]
اور اُن میں چاند کو نور اور سورج کو چراغ بنایا؟ سورة نوح [16]
اور اللہ نے تم کو زمین سے عجیب طرح اگایا سورة نوح [17]
پھر وہ تمہیں اِسی زمین میں واپس لے جائے گا اور اِس سے یکایک تم کو نکال کھڑا کرے گا سورة نوح [18]
اور اللہ نے زمین کو تمہارے لیے فرش کی طرح بچھا دیا سورة نوح [19]
تاکہ تم اس کے اندر کھلے راستوں میں چلو‘‘ سورة نوح [20]
نوحؑ نے کہا، ’’میرے رب، اُنہوں نے میری بات رد کر دی اور اُن (رئیسوں) کی پیروی کی جو مال اور اولاد پا کر اور زیادہ نامراد ہو گئے ہیں سورة نوح [21]
اِن لوگوں نے بڑا بھاری مکر کا جال پھیلا رکھا ہے سورة نوح [22]
اِنہوں نے کہا ہرگز نہ چھوڑو اپنے معبودوں کو، اور نہ چھوڑو وَدّ اور سُواع کو، اور نہ یَغُوث اور یَعُوق اور نَسر کو سورة نوح [23]
انہوں نے بہت لوگوں کو گمراہ کیا ہے، اور تو بھی اِن ظالموں کو گمراہی کے سوا کسی چیز میں ترقی نہ دے‘‘ سورة نوح [24]
اپنی خطاؤں کی بنا پر ہی وہ غرق کیے گئے اور آگ میں جھونک دیے گئے، پھر انہوں نے اپنے لیے اللہ سے بچانے والا کوئی مددگار نہ پایا سورة نوح [25]
اور نوحؑ نے کہا، ’’میرے رب، اِن کافروں میں سے کوئی زمین پر بسنے والا نہ چھوڑ سورة نوح [26]
اگر تو نے اِن کو چھوڑ دیا تو یہ تیرے بندوں کو گمراہ کریں گے اور اِن کی نسل سے جو بھی پیدا ہوگا بدکار اور سخت کافر ہی ہوگا سورة نوح [27]
میرے رب، مجھے اور میرے والدین کو اور ہر اس شخص کو جو میرے گھر میں مومن کی حیثیت سے داخل ہوا ہے، اور سب مومن مردوں اور عورتوں کو معاف فرما دے، اور ظالموں کے لیے ہلاکت کے سوا کسی چیز میں اضافہ نہ کر‘‘ سورة نوح [28]