ترجمہ قرآن » سورة الحجر - الحجر
سورة الحجر [0]
ا ل ر یہ آیات ہیں کتاب الٰہی اور قرآن مبین کی سورة الحجر [1]
بعید نہیں کہ ایک وقت وہ آ جائے جب وہی لوگ جنہوں نے آج (دعوت اسلام کو قبول کرنے سے) انکار کر دیا ہے پچھتا پچھتا کر کہیں گے کہ کاش ہم نے سر تسلیم خم کر دیا ہوتا سورة الحجر [2]
چھوڑو اِنہیں کھائیں، پییں، مزے کریں، اور بھلاوے میں ڈالے رکھے اِن کو جھوٹی امید عنقریب اِنہیں معلوم ہو جائے گا سورة الحجر [3]
ہم نے اِس سے پہلے جس بستی کو بھی ہلاک کیا ہے اس کے لیے ایک خاص مہلت عمل لکھی جاچکی تھی سورة الحجر [4]
کوئی قوم نہ اپنے وقت مقرر سے پہلے ہلاک ہوسکتی ہے، نہ اُس کے بعد چھوٹ سکتی ہے سورة الحجر [5]
یہ لوگ کہتے ہیں ’’اے وہ شخص جس پر ذکر نازل ہوا ہے، تو یقیناً دیوانہ ہے سورة الحجر [6]
اگر تو سچا ہے تو ہمارے سامنے فرشتوں کو لے کیوں نہیں آتا؟‘‘ سورة الحجر [7]
ہم فرشتوں کو یوں ہی نہیں اتار دیا کرتے وہ جب اترتے ہیں تو حق کے ساتھ اترتے ہیں، اور پھر لوگوں کو مہلت نہیں دی جاتی سورة الحجر [8]
رہا یہ ذکر، تو اِس کو ہم نے نازل کیا ہے اور ہم خود اِس کے نگہبان ہیں سورة الحجر [9]
اے محمدؐ، ہم تم سے پہلے بہت سی گزری ہوئی قوموں میں رسول بھیج چکے ہیں سورة الحجر [10]
کبھی ایسا نہیں ہوا کہ اُن کہ پاس کوئی رسول آیا ہو اور اُنہوں نے اُس کا مذاق نہ اڑایا ہو سورة الحجر [11]
مجرمین کے دلوں میں تو ہم اس ذکر کو اِسی طرح (سلاخ کے مانند) گزارتے ہیں سورة الحجر [12]
وہ اِس پر ایمان نہیں لایا کرتے قدیم سے اِس قماش کے لوگوں کا یہی طریقہ چلا آ رہا ہے سورة الحجر [13]
اگر ہم اُن پر آسمان کا کوئی دروازہ کھول دیتے اور وہ دن دہاڑے اُس میں چڑھنے بھی لگتے سورة الحجر [14]
تب بھی وہ یہی کہتے کہ ہماری آنکھوں کو دھوکا ہو رہا ہے، بلکہ ہم پر جادو کر دیا گیا ہے سورة الحجر [15]
یہ ہماری کار فرمائی ہے کہ آسمان میں ہم نے بہت سے مضبوط قلعے بنائے، اُن کو دیکھنے والوں کے لیے مزین کیا سورة الحجر [16]
اور ہر شیطان مردود سے ان کو محفوظ کر دیا سورة الحجر [17]
کوئی شیطان ان میں راہ نہیں پا سکتا، الا یہ کہ کچھ سن گن لے لے اور جب وہ سن گن لینے کی کوشش کرتا ہے تو ایک شعلہ روشن اُس کا پیچھا کرتا ہے سورة الحجر [18]
ہم نے زمین کو پھیلایا، اُس میں پہاڑ جمائے، اس میں ہر نوع کی نباتات ٹھیک ٹھیک نپی تلی مقدار کے ساتھ اگائی سورة الحجر [19]
اور اس میں معیشت کے اسباب فراہم کیے، تمہارے لیے بھی اور اُن بہت سی مخلوقات کے لیے بھی جن کے رازق تم نہیں ہو سورة الحجر [20]
کوئی چیز ایسی نہیں جس کے خزانے ہمارے پاس نہ ہوں، اور جس چیز کو بھی ہم نازل کرتے ہیں ایک مقرر مقدار میں نازل کرتے ہیں سورة الحجر [21]
بار آور ہواؤں کو ہم ہی بھیجتے ہیں، پھر آسمان سے پانی برساتے ہیں، اور اُس پانی سے تمہیں سیراب کرتے ہیں اِس دولت کے خزانہ دار تم نہیں ہو سورة الحجر [22]
زندگی اور موت ہم دیتے ہیں، اور ہم ہی سب کے وارث ہونے والے ہیں سورة الحجر [23]
پہلے جو لوگ تم میں سے ہو گزرے ہیں اُن کو بھی ہم نے دیکھ رکھا ہے، اور بعد کے آنے والے بھی ہماری نگاہ میں ہیں سورة الحجر [24]
یقیناً تمہارا رب ان سب کو اکٹھا کرے گا، وہ حکیم بھی ہے اور علیم بھی سورة الحجر [25]
ہم نے انسان کو سٹری ہوئی مٹی کے سوکھے گارے سے بنایا سورة الحجر [26]
اور اُس سے پہلے جنوں کو ہم آگ کی لپٹ سے پیدا کر چکے تھے سورة الحجر [27]
پھر یاد کرو اُس موقع کو جب تمہارے رب نے فرشتوں سے کہا کہ "میں سڑی ہوئی مٹی کے سوکھے گارے سے ایک بشر پیدا کر رہا ہوں سورة الحجر [28]
جب میں اُسے پورا بنا چکوں اور اس میں اپنی روح سے کچھ پھونک دوں تو تم سب اس کے آگے سجدے میں گر جانا‘‘ سورة الحجر [29]
چنانچہ تمام فرشتوں نے سجدہ کیا سورة الحجر [30]
سوائے ابلیس کے کہ اُس نے سجدہ کرنے والوں کا ساتھ دینے سے انکار کر دیا سورة الحجر [31]
رب نے پوچھا ’’اے ابلیس، تجھے کیا ہوا کہ تو نے سجدہ کرنے والوں کا ساتھ نہ دیا؟ سورة الحجر [32]
اس نے کہا ’’میرا یہ کام نہیں ہے کہ میں اِس بشر کو سجدہ کروں جسے تو نے سڑی ہوئی مٹی کے سوکھے گارے سے پیدا کیا ہے‘‘ سورة الحجر [33]
رب نے فرمایا ’’اچھا تو نکل جا یہاں سے کیونکہ تو مردود ہے سورة الحجر [34]
اور اب روز جزا تک تجھ پر لعنت ہے‘‘ سورة الحجر [35]
اُس نے عرض کیا ’’میرے رب، یہ بات ہے تو پھر مجھے اُس روز تک کے لیے مہلت دے جبکہ سب انسان دوبارہ اٹھائے جائیں گے‘‘ سورة الحجر [36]
فرمایا’’اچھا، تجھے مہلت ہے سورة الحجر [37]
اُس دن تک جس کا وقت ہمیں معلوم ہے‘‘ سورة الحجر [38]
وہ بولا ’’میرے رب، جیسا تو نے مجھے بہکایا اُسی طرح اب میں زمین میں اِن کے لیے دل فریبیاں پیدا کر کے اِن سب کو بہکا دوں گا سورة الحجر [39]
سوائے تیرے اُن بندوں کے جنہیں تو نے اِن میں سے خالص کر لیا ہو‘‘ سورة الحجر [40]
فرمایا ’’یہ راستہ ہے جو سیدھا مجھ تک پہنچتا ہے سورة الحجر [41]
بے شک، جو میرے حقیقی بندے ہیں ان پر تیرا بس نہ چلے گا تیرا بس تو صرف اُن بہکے ہوئے لوگوں ہی پر چلے گا جو تیری پیروی کریں سورة الحجر [42]
اور ان سب کے لیے جہنم کی وعید ہے‘‘ سورة الحجر [43]
یہ جہنم (جس کی وعید پیروان ابلیس کے لیے کی گئی ہے) اس کے سات دروازے ہیں ہر دروازے کے لیے اُن میں سے ایک حصہ مخصوص کر دیا گیا ہے سورة الحجر [44]
بخلاف اِس کے متقی لوگ باغوں اور چشموں میں ہوں گے سورة الحجر [45]
اور اُن سے کہا جائے گا کہ داخل ہو جاؤ ان میں سلامتی کے ساتھ بے خوف و خطر سورة الحجر [46]
اُن کے دلوں میں جو تھوڑی بہت کھوٹ کپٹ ہوگی اسے ہم نکال دیں گے، وہ آپس میں بھائی بھائی بن کر آمنے سامنے تختوں پر بیٹھیں گے سورة الحجر [47]
اُنہیں نہ وہاں کسی مشقت سے پالا پڑے گا اور نہ وہ وہاں سے نکالے جائیں گے سورة الحجر [48]
اے نبیؐ، میرے بندوں کو خبر دے دو کہ میں بہت درگزر کرنے والا اور رحیم ہوں سورة الحجر [49]
مگر اِس کے ساتھ میرا عذاب بھی نہایت دردناک عذاب ہے سورة الحجر [50]
اور انہیں ذرا ابراہیمؑ کے مہمانوں کا قصہ سناؤ سورة الحجر [51]
جب وہ آئے اُس کے ہاں اور کہا ’’سلام ہو تم پر،‘‘ تو اُس نے کہا ’’ہمیں تم سے ڈر لگتا ہے‘‘ سورة الحجر [52]
اُنہوں نے جواب دیا ’’ڈرو نہیں، ہم تمہیں ایک بڑے سیانے لڑکے کی بشارت دیتے ہیں‘‘ سورة الحجر [53]
ابراہیمؑ نے کہا ’’کیا تم اِس بڑھاپے میں مجھے اولاد کی بشارت دیتے ہو؟ ذرا سوچو تو سہی کہ یہ کیسی بشارت تم مجھے دے رہے ہو؟‘‘ سورة الحجر [54]
اُنہوں نے جواب دیا ’’ہم تمہیں برحق بشارت دے رہے ہیں، تم مایوس نہ ہو‘‘ سورة الحجر [55]
ابراہیمؑ نے کہا ’’اپنے رب کی رحمت سے مایوس تو گمراہ لوگ ہی ہوا کرتے ہیں‘‘ سورة الحجر [56]
پھر ابراہیمؑ نے پوچھا ’’اے فرستادگان الٰہی، وہ مہم کیا ہے جس پر آپ حضرات تشریف لائے ہیں؟‘‘ سورة الحجر [57]
وہ بولے، ’’ہم ایک مجرم قوم کی طرف بھیجے گئے ہیں سورة الحجر [58]
صرف لوطؑ کے گھر والے مستثنیٰ ہیں، ان سب کو ہم بچا لیں گے سورة الحجر [59]
سوائے اُس کی بیوی کے جس کے لیے (اللہ فرماتا ہے کہ) ہم نے مقدر کر دیا ہے کہ وہ پیچھے رہ جانے والوں میں شامل رہے گی‘‘ سورة الحجر [60]
پھر جب یہ فرستادے لوطؑ کے ہاں پہنچے سورة الحجر [61]
تو اُس نے کہا ’’آپ لوگ اجنبی معلوم ہوتے ہیں‘‘ سورة الحجر [62]
اُنہوں نے جواب دیا "نہیں، بلکہ ہم وہی چیز لے کر آئے ہیں جس کے آنے میں یہ لوگ شک کر رہے تھے سورة الحجر [63]
ہم تم سے سچ کہتے ہیں کہ ہم حق کے ساتھ تمہارے پاس آئے ہیں سورة الحجر [64]
لہٰذا اب تم کچھ رات رہے اپنے گھر والوں کو لے کر نکل جاؤ اور خود ان کے پیچھے پیچھے چلو تم میں سے کوئی پلٹ کر نہ دیکھے بس سیدھے چلے جاؤ جدھر جانے کا تمہیں حکم دیا جا رہا ہے‘‘ سورة الحجر [65]
اور اُسے ہم نے اپنا یہ فیصلہ پہنچا دیا کہ صبح ہوتے ہوتے اِن لوگوں کی جڑ کاٹ دی جائے گی سورة الحجر [66]
اتنے میں شہر کے لوگ خوشی کے مارے بے تاب ہو کر لوطؑ کے گھر چڑھ آئے سورة الحجر [67]
لوطؑ نے کہا ’’بھائیو، یہ میرے مہمان ہیں، میری فضیحت نہ کرو سورة الحجر [68]
اللہ سے ڈرو، مجھے رسوا نہ کرو‘‘ سورة الحجر [69]
وہ بولے ’’کیا ہم بارہا تمہیں منع نہیں کر چکے ہیں کہ دنیا بھر کے ٹھیکے دار نہ بنو؟‘‘ سورة الحجر [70]
لوطؑ نے عاجز ہو کر کہا ’’اگر تمہیں کچھ کرنا ہی ہے تو یہ میری بیٹیاں موجود ہیں!‘‘ سورة الحجر [71]
تیری جان کی قسم اے نبیؐ، اُس وقت اُن پر ایک نشہ سا چڑھا ہوا تھا جس میں وہ آپے سے باہر ہوئے جاتے تھے سورة الحجر [72]
آخرکار پو پھٹتے ہی اُن کو ایک زبردست دھماکے نے آ لیا سورة الحجر [73]
اور ہم نے اُس بستی کو تل پٹ کر کے رکھ دیا اور ان پر پکی ہوئی مٹی کے پتھروں کی بارش برسا دی سورة الحجر [74]
اِس واقعے میں بڑی نشانیاں ہیں اُن لوگوں کے لیے جو صاحب فراست ہیں سورة الحجر [75]
اور وہ علاقہ (جہاں یہ واقعہ پیش آیا تھا) گزرگاہ عام پر واقع ہے سورة الحجر [76]
اُس میں سامان عبرت ہے اُن لوگوں کے لیے جو صاحب ایمان ہیں سورة الحجر [77]
اور ایکہ والے ظالم تھے سورة الحجر [78]
تو دیکھ لو کہ ہم نے بھی اُن سے انتقام لیا، اور اِن دونوں قوموں کے اجڑے ہوئے علاقے کھلے راستے پر واقع ہیں سورة الحجر [79]
حجر کے لوگ بھی رسولوں کی تکذیب کر چکے ہیں سورة الحجر [80]
ہم نے اپنی آیات اُن کے پاس بھیجیں، اپنی نشانیاں اُن کو دکھائیں، مگر وہ سب کو نظر انداز ہی کرتے رہے سورة الحجر [81]
وہ پہاڑ تراش تراش کر مکان بناتے تھے اور اپنی جگہ بالکل بے خوف اور مطمئن تھے سورة الحجر [82]
آخرکار ایک زبردست دھماکے نے اُن کو صبح ہوتے آ لیا سورة الحجر [83]
اور اُن کی کمائی اُن کے کچھ کام نہ آئی سورة الحجر [84]
ہم نے زمین اور آسمان کو اور ان کی سب موجودات کو حق کے سوا کسی اور بنیاد پر خلق نہیں کیا ہے، اور فیصلے کی گھڑی یقیناً آنے والی ہے، پس اے محمدؐ، تم (اِن لوگوں کی بیہودگیوں پر) شریفانہ درگزر سے کام لو سورة الحجر [85]
یقیناً تمہارا رب سب کا خالق ہے اور سب کچھ جانتا ہے سورة الحجر [86]
ہم نے تم کو سات ایسی آیتیں دے رکھی ہیں جو بار بار دہرائی جانے کے لائق ہیں، اور تمہیں قرآن عظیم عطا کیا ہے سورة الحجر [87]
تم اُس متاع دنیا کی طرف آنکھ اٹھا کر نہ دیکھو جو ہم نے اِن میں سے مختلف قسم کے لوگوں کو دے رکھی ہے، اور نہ اِن کے حال پر اپنا دل کڑھاؤ انہیں چھوڑ کر ایمان لانے والوں کی طرف جھکو سورة الحجر [88]
اور (نہ ماننے والوں سے) کہہ دو کہ میں تو صاف صاف تنبیہ کرنے والا ہوں سورة الحجر [89]
یہ اُسی کی طرح کی تنبیہ ہے جیسی ہم نے اُن تفرقہ پردازوں کی طرف بھیجی تھی سورة الحجر [90]
جنہوں نے اپنے قرآن کو ٹکڑے ٹکڑے کر ڈالا ہے سورة الحجر [91]
تو قسم ہے تیرے رب کی، ہم ضرور ان سب سے پوچھیں گے سورة الحجر [92]
کہ تم کیا کرتے رہے ہو سورة الحجر [93]
پس اے نبیؐ، جس چیز کا تمہیں حکم دیا جا رہا ہے، اُسے ہانکے پکارے کہہ دو اور شرک کرنے والوں کی ذرا پروا نہ کرو سورة الحجر [94]
تمہاری طرف سے ہم اُن مذاق اڑانے والوں کی خبر لینے کے لیے کافی ہیں سورة الحجر [95]
جو اللہ کے ساتھ کسی اور کو بھی خدا قرار دیتے ہیں عنقریب انہیں معلوم ہو جائے گا سورة الحجر [96]
ہمیں معلوم ہے کہ جو باتیں یہ لوگ تم پر بناتے ہیں ان سے تمہارے دل کو سخت کوفت ہوتی ہے سورة الحجر [97]
اس کا علاج یہ ہے کہ اپنے رب کی حمد کے ساتھ اس کی تسبیح کرو، اس کی جناب میں سجدہ بجا لاؤ سورة الحجر [98]
اور اُس آخری گھڑی تک اپنے رب کی بندگی کرتے رہو جس کا آنا یقینی ہے سورة الحجر [99]